尋找滲水原因

2012年2月9日執修天花之後，暫時無再發現滲水‧‧‧

因為天花滲水，所以管業處要再派人跟進﹝今次主管負責﹞，情況係 :

1) 滲水當天無落雨，觀察外牆，無裂縫、無石屎老化
2) 樓上幾層單位，喉管乾爽，無滲水，亦無人投訴相關問題
3) 我單位滲水位置，係浴室近廳天花，檢查樓上水箱坐廁 (無發現)
4) 用色粉試樓上單位企缸 (無發現 )5) 樓上單位洗手盆，雖然有部份瓦仔鬆脫，試水後 ( 無發現)
6) 今個星期六會試埋樓上浴室地磚

  天花未搞掂，裝修放咗英泥、工具係廳

 

無縫地板都爛埋 (無得修補)

 

如果試埋樓上浴室地磚，都無發現‧‧‧主管解釋：可能係上次，樓上單位企缸邊位唧膠老化，對方係有修葺，但係無清積水，所以我地做執修時，積水湧現。

 

若果再無發現，我地天花又無再滲水，會大約一個月後，管業處出錢撘棚，幫我地修葺外牆 ﹝管業處~ 雖然話唔關外牆事、但係點都要搵 d 嘢嚟搞‧‧‧﹞

 



 

 

沙 Dee : 唔知仲要搞幾耐呢?
 

 

星期六, 老公同管業處班人玩試水，我陪沙 Dee 入房瞓覺覺 

 

 

大件事

2012年2月8日~開始執修天花，原先係批灰補油，點知師傅一出手， 即刻出事， 天花石屎脫落， 鋼根外露，最後裝修公司，要派多一位泥水師傅上門，商討後要補多 $700

第一天開工，已經嚇到阿仔，半日唔見貓，今晚我返到屋企抱佢，靚仔仲驚緊，身震腳又震，超級無膽貓。

 

執修天花

網友送我 "沙 Dee" 素描

 

2012年1月13日晚 ~ 發現客廳天花有水積, 要管業處跟進, 幾日後回覆, 係樓上單位, 浴缸唧膠老化, 出現滲漏, 已通知樓上單位業主盡快維修.

 

早幾日收到管業處通知, 樓上單位已經維修好, 係時候到我地揾人執修天花,  我揾開位裝修師傅(走咗佬), 管業處介紹咗條裝修大叔俾我地, 客廳約佰零尺, 佢報價 $8,000 , 尋日老公生日, 放假一天, 順便揾其他裝修公司報價, 最終 $3,500 要搞四日, 但係未開得工住.....仲要等保險公司, 索償回覆 (真係麻煩, 早知唔 claim 保險)